Հայտարարություն «Վիվա Արմենիա» ՓԲԸ դոլարային պարտատոմսերի հրապարակային առաջարկի վերաբերյալ

2025 թվականի փետրվարի 12-ից մինչ 2025 թվականի հունիսի 23-ը ներառյալ «Ամերիաբանկ» ՓԲԸ-ն նախատեսում է հրապարակային առաջարկի միջոցով տեղաբաշխել «Վիվա Արմենիա» ՓԲ Ընկերության անվանական արժեկտրոնային ոչ փաստաթղթային պարտատոմսերը` հետևյալ պայմաններով.

«Վիվա Արմենիա» ՓԲԸ պարտատոմսերի ազդագիրը գրանցվել է ՀՀ կենտրոնական բանկի նախագահի 2025թ. հունվարի 22-ի թիվ 1/17 Ա որոշմամբ:

Ներդրողները Ազդագրի և դրա լրացման տպագիր տարբերակները կարող են ձեռք բերել «ԱՄԵՐԻԱԲԱՆԿ» ՓԲԸ (այսուհետ՝ Բանկ) գլխամասային գրասենյակում (հասցե՝ ՀՀ, 0010 Երևան, Վազգեն Սարգսյան 2), իսկ էլեկտրոնային տարբերակները՝ ստորև ներկայացված հղումներով:

Պարտատոմսերի ձեռքբերման համար ներդրողները սահմանված կարգով պետք է լրացնեն և Տեղաբաշխողին պատշաճ կերպով ներկայացնեն պարտատոմսերի ձեռքբերման հայտ-հանձնարարական, որով հավաստում են թողարկման պայմաններն ընդունելու իրենց պատրաստակամությունը և որով այդ պայմանները դառնում են ներդրողների համար պարտադիր:

Պարտատոմսերի ձեռքբերման հայտ-հանձնարարականը կհամարվի պատշաճ կերպով ներկայացված Տեղաբաշխողին, եթե այն ներկայացվել է Տեղաբաշխողին ներքոնշյալ համակարգերից կամ կապի միջոցներից որևէ մեկի միջոցով.

Պարտատոմսերի ձեռքբերման հայտ-հանձնարարականի լրացումից և պատշաճ կերպով Տեղաբաշխողին ներկայացնելուց հետո պարտատոմսերի ձեռքբերման համար համապատասխան դրամական միջոցները ներդրողների կողմից պետք է մուտքագրվեն թողարկման նպատակով «ԱՄԵՐԻԱԲԱՆԿ» ՓԲԸ-ում բացված 1570043109811401 հաշվեհամարին՝ մինչև հայտ-հանձնարարականի ներկայացման օրվա ավարտը: MyAmeria հավելվածի MyInvest հարթակի միջոցով ձեռքբերում իրականացնող ֆիզիկական անձինք հնարավորություն ունեն նույն հարթակի միջոցով իրականացնել պարտատոմսերի ձեռքբերման համար համապատասխան դրամական միջոցների մուտքագրումը, ինչպես նաև արժեթղթերի հաշվի բացումն ավտոմատ կերպով:

Ներդրողները տեղեկացվում են իրենց հայտ-հանձնարարականների բավարարման մասին հայտի ներկայացման օրվան հաջորդող 1 աշխատանքային օրվա ընթացքում:

Ի՞նչ է պարտատոմսը:

Պարտատոմս է համարվում այն արժեթուղթը, որը հավաստում է դրա տիրապետողի իրավունքը` դրանում նախատեսված ժամկետում պարտատոմս թողարկած անձից ստանալ պարտատոմսի անվանական արժեքը: Պարտատոմսը դրա տիրապետողին իրավունք է տալիս նաև ստանալ պարտատոմսի անվանական արժեքից տոկոս:

Ո՞ւմ է ուղղված պարտատոմսերի հրապարակային առաջարկը:

Պարտատոմսերի թողարկումը և հրապարակային առաջարկն իրականացվում են ՀՀ տարածքում` համաձայն ՀՀ օրենսդրության և ենթաօրենսդրական ակտերի:

Ի՞նչ պարտատոմս է առաջարկվում Ընկերության կողմից:

Ընկերությունն առաջարկում է դոլարային պարտատոմսեր հետևյալ պայմաններով.

Թողարկողը	«Վիվա Արմենիա» ՓԲԸ
Դասը	անվանական արժեկտրոնային
Անվանական արժեքը	100 ԱՄՆ դոլար
Ընդհանուր ծավալը	80,000,000 ԱՄՆ դոլար
Քանակը	800,000 հատ
Ձեռքբերման նվազագույն քանակը	10 հատ
Շրջանառության ժամկետը	36 ամիս
Արժեկտրոնային տոկոսադրույքը	7.65%
Արժեկտրոնների վճարման պարբերականությունը	6 ամիս

Ի՞նչ եկամուտներ կարող եմ ստանալ պարտատոմսերից:

Ներդրողները պարտատոմսերից եկամուտներ կարող են ստանալ արժեկտրոնի տեսքով, իսկ բարենպաստ շուկայական կոնյուկտուրայի պարագայում նաև ավելի բարձր գնով վաճառելու (օտարելու) դեպքում:

Արդյոք կկարողանա՞մ ավելի բարձր գնով վաճառել պարտատոմսերը:

Պարտատոմսերի գինը կախված է պարտատոմսերի նկատմամբ շուկայական առաջարկից և պահանջարկից: Պարտատոմսերի գինը բորսայում կարող է բարձրանալ կամ իջնել տարբեր գործոններով պայմանավորված՝ ներդրողի համար առաջացնելով օգուտ կամ վնաս:

Արդյոք պարտատոմսերից ստացվող տոկոսային եկամուտները ենթակա՞ են հարկման:

Ակնկալվում է, որ շրջանառվող օրենքի նախագծի համաձայն Բորսայում ցուցակված պարտատոմսերից ստացվող տոկոսային եկամուտները ենթակա չեն լինի հարկման մինչև 2027թ. դեկտեմբերի 31-ը:

Որտե՞ղ կարող եմ ամբողջական տեղեկատվություն ստանալ Ընկերության և առաջարկվող պարտատոմսերի վերաբերյալ:

Ընկերության և առաջարկվող պարտատոմսերի վերաբերյալ ամբողջական տեղեկատվությունը ներկայացված է պարտատոմսերի թողարկման Ազդագրով, որը հասանելի է «Վիվա Արմենիա» ՓԲԸ և «Ամերիաբանկ» ՓԲԸ պաշտոնական կայքէջերում:

Ինչպե՞ս կարող եմ ձեռք բերել առաջարկվող պարտատոմսերը:

Պարտատոմսերի վաճառքն իրականացվում է տեղաբաշխողի` «Ամերիաբանկ» ՓԲԸ-ի կողմից: Պարտատոմսերի ձեռքբերման հնարավոր տարբերակներն են.

• Օնլայն եղանակով`Ամերիաբանկի MyAmeria հավելվածի MyInvest հարթակի միջոցով պարտատոմսերի ձեռքբերման էլեկտրոնային հայտ ներկայացնելու միջոցով:
• Առձեռն` այցելելով Ամերիաբանկի որևէ մասնաճյուղ և հաճախորդի մենեջերների միջոցով լրացնելով պարտատոմսերի ձեռքբերման հայտը:
• Պարտատոմսերի ձեռքբերման հայտի ձևը լրացված ուղարկելով Ամերիաբանկի համապատասխան էլ. հասցեին` capitalmarkets@ameriabank.am: Այս դեպքում պետք է ունենալ գործող արժեթղթերի պահառության հաշիվ և ապահովել պարտատոմսերի դիմաց վճարումը 1570043109811401 հաշվեհամարին նույն օրվա ընթացքում:

Պարտատոմսերը ձեռք բերելու համար արդյո՞ք անհրաժեշտ է դառնալ Ամերիաբանկի հաճախորդ:

Ոչ, սակայն MyInvest հարթակի միջոցով էլեկտրոնային հայտ ներկայացնել կարող են միայն Ամերիաբանկի` ֆիզիկական անձ հանդիսացող հաճախորդները:

Ինչպե՞ս կարող եմ դառնալ Ամերիաբանկի հաճախորդ:

Հաճախորդ կարելի է դառնալ Ամերիաբանկի որևէ մասնաճյուղում: Ֆիզիկական անձինք կարող են բանկային հաշիվ բացել և հաճախորդ դառնալ նաև առցանց` https://smart-apply.ameriabank.am/

Բանկային հաշվից բացի, ի՞նչ այլ հաշիվ պետք է ունենա ներդրողը:

Պարտատոմսերի ձեռքբերման նպատակով ներդրողը պետք է ունենա դոլարային հաշիվ և նաև արժեթղթերի հաշիվ: Ամերիաբանկի MyInvest հարթակի միջոցով պարտատոմսերի ձեռքբերման էլեկտրոնային հայտ ներկայացնող ներդրողները հնարավորություն ունեն բացելու արժեթղթերի հաշիվն առցանց եղանակով:

Արդյոք կա՞ հաշվի բացման վճար:

Ամերիաբանկում բանկային հաշվի բացումն օնլայն եղանակով ու սպասարկումն անվճար է, սակայն արժեթղթերի հաշիվ բացելու դեպքում գործում է տարեկան 5,000 ՀՀ դրամ արժեթղթերի (դեպո) հաշվի սպասարկման վճար (պահառության հաշվի վրա նաև օտարերկրյա արժեթղթեր պահելու դեպքում վճարը կարող է փոփոխական լինել): Ամերիաբանկից բացի, այլ լիցենզավորված ընկերության մոտ բանկային և/կամ արժեթղթերի հաշվի բացման նետ կապված վճարների առկայության մասին տեղեկատվություն ներդրողները կարող են ստանալ տվյալ ընկերություններից:

Արդյոք պարտատոմսեր ձեռք բերելիս առկա՞ են այլ ծախսեր:

Տեղաբաշխման ժամանակ պարտատոմսերը ձեռք բերող անձանցից հավելյալ ծախսեր և հարկեր չեն գանձվելու: Եթե ներդրողը պարտատոմսերի ձեռքբերումը իրականացնելու է իր բրոքերային ընկերության միջոցով, ապա վճարման գործընթացի մանրամասները պետք է հստակեցնի իրեն սպասարկող բրոքերային ընկերության հետ: Եթե ներդրողը պարտատոմսերի ձեռք բերման համար անհրաժեշտ գումարն Ամերիաբանկում բացված թողարկողի հաշվին փոխանցելու է այլ բանկից, ներդրողը պետք է այդ բանկից ճշտի փոխանցման հետ կապված ծախսերի ու միջնորդավճարների մանրամասները, եթե այդպիսիք կան:

Կարո՞ղ եմ վաճառել պարտատոմսերը ձեռք բերելուց հետո:

Պարտատոմսերը հնարավոր է վաճառել Հայաստանի ֆոնդային բորսայում դրանց ցուցակումից և առևտրին թույլատրումից հետո: Մինչև ցուցակումը ներդրողները պետք է տեղյակ լինեն, որ իրենց ձեռք բերած պարտատոմսերի վաճառելու հնարավորությունը խիստ սահմանափակ է:

Ե՞րբ կցուցակվեն պարտատոմսերը:

Պարտատոմսերի տեղաբաշխման ավարտից հետո` 5 աշխատանքային օրվա ընթացքում, Ընկերությունը կդիմի «Հայաստանի ֆոնդային բորսա» ԲԲԸ-ին պարտատոմսերի ցուցակման և առևտրին թույլատրման նպատակով: Ցուցակման գործընթացը միջինում տևում է 2-3 շաբաթ:

Ի՞նչ է անհրաժեշտ բորսայում պարտատոմսերով առուվաճառք իրականացնելու համար:

Բորսայում պարտատոմսերով գործարք իրականացնելու համար ներդրողը պետք է օգտվի բրոքերային ծառայությունից: Բրոքերային ծառայությունները մատուցվում են տեղական մի շարք բանկերի և ներդրումային ընկերությունների կողմից: Ամերիաբանկի բրոքերային ծառայություններից օգտվող ֆիզիկական անձինք կարող են բորսայում պարտատոմսերով գործարք իրականացնել առցանց՝ MyInvest հարթակի միջոցով:

Ի՞նչ ծախսեր են առաջանում Բորսայում պարտատոմսերով գործարք իրականացնելիս:

Պարտատոմսերով գործարք իրականացնելիս կիրառվում է բորսայական միջնորդավճար, որը կազմում է գործարքի 0.005%-ը: Բորսայական միջնորդավճարից զատ, բրոքերի կողմից կարող է կիրառվել հավելյալ միջնորդավճար, որի մասին ներդրողը կարող է տեղեկանալ իր բրոքերից: Ամերիաբանկի կողմից բորսայական գործարքների համար կիրառվում է բրոքերային միջնորդավճար՝ 0.1% գործարքի արժեքից, նվազագույնը` 2,000 ՀՀ դրամ: